ಹದೀಸ್ ನಿಷೇಧ: ದೇಹದಿಂದ ಕತ್ತನ್ನು ಕೊಯ್ದು ಬೇರ್ಪಡಿಸುವ ವಿಕೃತವಾದವದು!
ಮದ್ಹಬ್ ಇಮಾಮ್ಗಳು ಇಸ್ಲಾಮೀ ಜಗತ್ತಿಗೆ ನೀಡಿದ ಕೊಡುಗೆಯೂ ಅನನ್ಯವಾದುದು. ಅಸಾಮಾನ್ಯವಾದುದು. ಹದೀಸ್ ಕ್ರೋಡೀಕರಣವಿಲ್ಲದ ಕಾಲದಲ್ಲಿ ಅವರು ಸಮಕಾಲೀನ ಮನುಷ್ಯರ ಸಮಸ್ಯೆಗಳಿಗೆ ದೈವಿಕ ಶಿಕ್ಷಣದ ಬೆಳಕಿನಲ್ಲಿ ಪರಿಹಾರ ಸೂಚಿಸುತ್ತಿದ್ದರು. ಜನರಿಗೆ ಬದುಕುವ ಕಲೆ ಮತ್ತು ಇಸ್ಲಾಮೀ ಶರೀಅತನ್ನು ಹಸ್ತಾಂತರಿಸುತ್ತಿದ್ದರು. ಧಾರಾಳ ಸವಾಲುಗಳನ್ನು ಎದುರಿಸಿದ ವಿದ್ವಾಂಸರವರು. ವಿಶೇಷತೆ ಏನೆಂದರೆ, ಅವರಲ್ಲಿ ಯಾರೂ ಕೂಡಾ ತಮ್ಮ ಅಭಿಪ್ರಾಯಗಳನ್ನು "ಮದ್ಹಬ್" ಎಂದು ಘೋಷಿಸಿ ಸಮಾಜದ ಮೇಲೆ ಹೇರಿಲ್ಲ. ಅಂಧಾನುಕರಣೆಗೆ ಅವಕಾಶ ನೀಡಲಿಲ್ಲ. ಬದಲಾಗಿ *ಮದ್ಹಬ್ ಇಮಾಮರುಗಳು ಎಷ್ಟು ಸೂಕ್ಷ್ಮತೆ, ಪ್ರಾಮಾಣಿಕತೆ ಪಾಲಿಸಿದರೆಂದರೆ:* "ನಾವು ಹೇಳಿದ್ದಕ್ಕೆ ವಿರುದ್ಧವಾಗಿ ನೀವು ಪ್ರವಾದಿವರ್ಯ(ಸ)ರ ಹದೀಸನ್ನು ಕಂಡರೆ, ನಮ್ಮ ಅಭಿಪ್ರಾಯಗಳನ್ನು ಬದಿಗಿಟ್ಟು ಪ್ರವಾದಿಚರ್ಯೆಗೆ ಹಿಂತಿರುಗಿರಿ ಮತ್ತು ನಮ್ಮ ಅಭಿಪ್ರಾಯವನ್ನು ತಿರಸ್ಕರಿಸಿರೆಂದು" ಅವರು ಸ್ವತಃ ಅವರ ಬಗ್ಗೆಯೇ ಹೇಳಿದ್ದಾರೆ. *ಆಧುನಿಕ ಹದೀಸ್ ನಿಷೇಧಿಗಳಂತೆ, ಅಲ್ಲಾಹನಿಗೇ ದೀನ್ ಕಲಿಸಲು ಹೊರಟಲಿಲ್ಲ. ಗೊತ್ತಿಲ್ಲದ್ದನ್ನು ಗೊತ್ತಿದೆ ಎಂಬ ಅಹಂಕಾರ ಮೆರೆಯಲಿಲ್ಲ.* (ಶಾಂತಂಪಾಪಂ)
*إذا صَحَّ الحَدِيثُ فَهُوَ مَذْهَبِي*
"ಹದೀಸ್ ದೃಢಪಟ್ಟರೆ ಅದುವೇ ನನ್ನ ಮದ್ಹಬ್ ಆಗಿದೆ" ಎಂಬುದು ಅವರೆಲ್ಲರ ಒಕ್ಕೊರಲಿನ ಘೋಷಣೆಯಾಗಿತ್ತು. ಅಂದರೆ ಇಸ್ಲಾಮಿನ ಧಾರ್ಮಿಕ ವಿಶ್ವಾಸ, ಆಚಾರ-ವಿಚಾರ, ಆರಾಧನೆ ಮತ್ತು ಜೀವನ ಶೈಲಿಗೆ ಕುರ್ಆನ್ ಮತ್ತು ಪ್ರವಾದಿಚರ್ಯೆಯೇ ಪುರಾವೆಯಾಗಿರಬೇಕು. ಇದು ಸತ್ಯವಿಶ್ವಾಸಿಗಳ ಮೇಲಿನ ಬಾಧ್ಯತೆಯಾಗಿದೆ. ಅದರ ಹೊರತು ಒಬ್ಬೊಬ್ಬ ಕಛೇರಿ ತೆರೆದು ಅವನವನಿಗೆ ತೋಚಿದಂತೆ ವ್ಯಾಖ್ಯಾನಿಸಿ ಹದೀಸ್ ಬೇಡವೆಂದರೆ ಈ ಸಮುದಾಯ ಎಲ್ಲೆಲ್ಲೋ ಅಲೆದಾಡಬೇಕಾಗುತ್ತದೆ.
*وَمَا كَانَ لِمُؤْمِنٍ وَلَا مُؤْمِنَةٍ إِذَا قَضَى اللَّهُ وَرَسُولُهُ أَمْرًا أَنْ يَكُونَ لَهُمُ الْخِيَرَةُ مِنْ أَمْرِهِمْ ۗ وَمَنْ يَعْصِ اللَّهَ وَرَسُولَهُ فَقَدْ ضَلَّ ضَلَالًا مُبِينًا*
"ಅಲ್ಲಾಹ್ ಮತ್ತು ಅವನ ಸಂದೇಶವಾಹಕರು ಯಾವುದಾದರೊಂದು ವಿಷಯದ ತೀರ್ಮಾನ ಮಾಡಿಬಿಟ್ಟರೆ ಆ ವಿಷಯದಲ್ಲಿ ಸ್ವತಃ ತೀರ್ಮಾನ ಕೈಗೊಳ್ಳುವ ಹಕ್ಕು (ಸತ್ಯವಿಶ್ವಾಸಿಗಳಾದ) ಯಾವ ಸ್ತ್ರೀ-ಪುರುಷರಿಗೂ ಇಲ್ಲ. ಯಾರಾದರೂ ಅಲ್ಲಾಹ್ ಮತ್ತು ಅವನ ಸಂದೇಶವಾಹಕರ ಆಜ್ಞೋಲ್ಲಂಘನೆ ಮಾಡಿದರೆ, ಅವನು ಸುವ್ಯಕ್ತ ಪಥಭ್ರಷ್ಟತೆಯಲ್ಲಿ ಬಿದ್ದುಬಿಟ್ಟನು."
*[ಪವಿತ್ರ ಕುರ್ಆನ್, 33:36]*
ವಾಸ್ತವದಲ್ಲಿ ಹದೀಸ್ನ ಪಾವನ ಆಶಯಗಳೇ ಕುರ್ಆನಿನ ವ್ಯಾಖ್ಯಾನ. ಇಸ್ಲಾಮೀ ಇತಿಹಾಸದುದ್ದಕ್ಕೂ ಉಲೆಮಾಗಳು ಅಂಗೀಕರಿಸಿದ ಸತ್ಯವದು. ಅವೆರೆಡನ್ನೂ ಬೇರ್ಪಡಿಸಿ ನನಗೆ ಕುರ್ಆನ್ ಮಾತ್ರ ಸಾಕು, ಹದೀಸ್ ಬೇಡ ಎಂಬ ಮೊಂಡುವಾದ, ದೇಹದಿಂದ ಕತ್ತನ್ನು ಕೊಯ್ದು ಬೇರ್ಪಡಿಸಿದಂತೆ. ಅದು ಕುರ್ಆನಿನ ಮೂಲ ಆಶಯಕ್ಕೇ ಕೊಡಲಿಯೇಟು ನೀಡಿದಂತೆ.
*مَنْ يُطِعِ الرَّسُولَ فَقَدْ أَطَاعَ اللَّهَ ۖ*
"ಯಾರು ರಸೂಲರನ್ನು ಅನುಸರಿಸುವನೋ ಖಂಡಿತವಾಗಿಯೂ ಅವನು ಅಲ್ಲಾಹನನ್ನು ಅನುಸರಿಸಿದನು."
*[ಪವಿತ್ರ ಕುರ್ಆನ್, 4:80]* ನೀವೇ ಯೋಚಿಸಿ. ಹದೀಸ್ ನಿಷೇಧಿಗಳಿಂದ ಕುರ್ಆನಿನ ಅರ್ಥ ಕಲಿಯಲು ಅಥವಾ ಗ್ರಾಮರ್ ಕಲಿಯಲು ಹೋದರೆ ನಮ್ಮ ಈಮಾನ್ ಎಲ್ಲಿಗೆ ತಲುಪಬಹುದು? ಧರ್ಮದ ವಿಷಯದಲ್ಲಿ ಆಧುನಿಕ ಹದೀಸ್ ನಿಷೇಧಿಗಳ ದುರ್ವ್ಯಾಖ್ಯಾನ ಅತ್ಯಂತ ಅಪಾಯಕರದ್ದು. ಹದೀಸ್ ಬೇಡವೆಂಬ ಸಿದ್ಧಾಂತವೇ ಮಾದಕ ವ್ಯಸನದಂತೆ. ಜನ ಬಹಳ ಬೇಗನೆ ಅದರತ್ತ ಆಕರ್ಷಿತರಾಗುತ್ತಾರೆ. ಏಕೆಂದರೆ ಅದು ಮೆಲ್ಲಮೆಲ್ಲನೆ ನಮಾಝ್, ಉಪವಾಸ... ಮತ್ತಿತರ ಆರಾಧನೆಗಳಿಂದ ಮುಕ್ತಿ ನೀಡುತ್ತದೆ. ಕೊನೆಗೆ ತಲುಪುವುದು ಮಾತ್ರ ನಾಸ್ತಿಕತೆಯತ್ತ. ಮತ್ತೆ ಅಲ್ಲಿಂದ ಹೊರಬರಲು ಸಾಧ್ಯವೇ ಇಲ್ಲ. ಆದ್ದರಿಂದ ಜಾಗೃತರಾಗೋಣ. ಈಮಾನ್ ಸಲಾಮತ್ಗಾಗಿ ದುಆ ಮಾಡೋಣ...
*✍️ ಮುಹಮ್ಮದ್ ಸಿದ್ದೀಕ್, ಜಕ್ರಿಬೆಟ್ಟು*
